Kan vangkhawpuia singkhuol changa a chȃm sung khan kan vangkhuoah lawi ang inthangin a mawi an tih, tlang zarêl reng dawnsak lovin nunkhuo kan pham hlak, a sieng zatam karah tu dang kan ngai nawh. Kan hun tawng le khawvêl pheikhai an ruol.
Khuonu malsâwmna dawng chung chuong biek a ei insieng khan, hlim êm êmin nunkhuo hai hmangin in sung suk lumtu tak ei lo ni hlak. Mihriemah eilo pieng a nun ei hang hmang țanna tak tak chu naupanglai hi a ni a, sienkhawm, hieng hunlai chun kawppui am ngaizâwng am ei la nei naw a, ngaituona chang khawm ei la hriet bawk nawh. Ei hang ințhanglien chun lungril, nunzie hai khawm hmâtieng sâwnin, ngaituona a’ndang deu ta a, a hma a ei lo ngaituo phâk reng reng ngai lo ei hung hriet țan tah a. Hieng hun ei hang palțanțîrlai hi a nih, mihriem hmangaina a ei inpêk a ei intuklût țan na chuh.
Ka lo ring ngailo le ka suongtuonaah khawm ka lo suongtuo phâk lo angel îenga nghâknu hmelțha sawrthlatuksuok ang el, a baksam tle siu, an nui siu siulai hmêl chu lam lakah chun ka hang hmu ta thut chun ka thisen zungzâm a fang suok vawng el a,kan hangin tuokpêl dinglai tak chun hmar tieng a thlifim hung hrâng hiu hiu chu a hmelțhatna’n a suk châwl thei ding tawp, khang khawpa hmelțha thli chungah ngei khawm thuneina anei thei ding kha; hring mi lai hin an pieng ta dim aw ti pumzing chun kan inpêl tah a. Khang êm êm a pumduongțha le hmelțha kha ka vawikhat piengmanah chun ka hmu phutna ti lang inkhêl kher naw nih.
Iengtin am, iengtin am aw a sakhming khawm ka hriet lo a sakhmêl in a mi phuor ka suongril hmangaina a min zungkeitu chu iengtinam in hmel hriet pui thei ka ti aw ti’n ka ngaituo rawp hlak a, sienkhawm hunin herzai a rêl thei sie nawh. Ni tam liemin thla tam a ral hnung chun a sakhmêl reng kimchang takin ka ngaituo khawm chun ka hriet suok thei ta naw rawp a, inhre ngailo kanlo ni khawma khanga a hmelțhatna lei ringawt hlimpui khawp a nei khan ka suongrilah thu tamtak a min paitir a, iengdang reng ka ngaituo thei ta nawh, a hmel kimchang taka hang hmufie nawk kha ka beisei tak chu a lo nih tah.
Ieng dinga a ma anga mit le lungril phurzotu ding ka hang in tuokpui kher kher am aw ti’n kan ngaituo kan ngaituo chun, mak danglam takin ka pa zâwl sunghai tûksiet an tûkna leiin, kan dingin kan hang fe ve chun thil awi um lo khawp, ring phâkbâk bâk khêlah chun a ma nu ngei chu silpawlin hnuoi deihlîpah chun a khât chauin a lo ințhung kuk el chu ka hmu chun tuoi anga thar in ka lungrilah chun a hung inlang thar nawk ta khup el a, a ma nu khawm chu a zak a lo si ve deu duoi chu lo ning a tih, kan zuk lût chun mi melzuk a thaw a hnuoi tieng a en nawk zuk el tah a. Kan lûtzo kan ințhung sâwt naw te hnungah chun tui khai a ngai a nih tlangvâl le nghâknu hai kha an ti chun mawngzâng takin kan tho far tawla a um hai po chu, tuikhurah kan fe diel diel tâwla kan khailai chun kan hangin biek țan tah a..
Kei – I hming I mi hril thei ding..? ka’ng ti ta țhuoi a.
Ama – he! he! he! hril thei e ah. Ka hming chu Lalhmangaisang ka nih. Nangte?
Kei - khai! I hming chu a va nal de..! Hehe.. ka hming chu John a nih. Anleh iengtin am ka ko I nuom ..?
Ama - Sangi ti’n mi ko el rawh, mi khawma an mi ko dân tlangpui ani tho a. Tak a ka va hmu’n ka hriet ngai naw che de..! ngai naw tieng lo ngai naw la maw.. iem insûngna deu in nei mawh ka puhai leh hin..hehe..
Kei - ah, nei hran taluo bek bek naw a chu ka pa zâwl sûnghai an na kan hung ve zawk chau a nih ie…
Sangi – e,, ani maw hehehe..i fel taluo ..
Kei - fel naw taluo el a nih hehehe…
Kan tuikhaipui hai chu an loin nêl tawl lei chun an ri a so bur bur tâk leiin kan inbiek thei ta rak naw a, kan tui khai dinghai khawm chu kan thâlbitzo chun kan hang kîr nawk tah a, chulaizing chun Sangi’n thla a hung lâk tâwl a, kan khaizo chun kan um khâwm diel diel a tie tie kan sepa kan innui dur dur tâwllai chun “thlalakhai hung send ka che i fawn nambar mihril rawh’’a tih a. Ringlo deuin khang khan inkuongkaina kan hungnei zawmpei ta chun kan innêl met met țan pei tah a.
“Naupang an umkhawm chun hlim deuin inpâwl ei tiu aw, vawisûn chu ei hlim naw kan laû ie, chu leiin hlim tawk takin inhnel tum ei tiu aw..” naupang chun hieng thilhai hi an ngaituo lâwk ngai nawh, a’n um khâwm chun an thil ngaituo le an thil thawah hlim êm êm in an inpâwl hlak ang khan Sangi le chun kei ni khawm chu, chu chan changin kan hungin kawp ta chun kan inngai êm êm el ta a, nikhat inbiek loa um chu harsa kan ti thei khawp el.
Ka hmangai in ami hmangai naw a, ka hmangai naw’n a mi hmangai a ti rêng um lovin kei ni ruok chu hlim êm êm, borûokțha takin kan in hmangai a. Kan in hmangai taluo leiin thiekthu chu a sie de khawmin kan in hmangaina karah chun inringzo takin hringkhuo chu kan hmang pei a, iengtiklai khawm kan ințawngtai pek tawn zinga, kan kâr sêltu le dâltu umlo na ding chun kan inhlân tak chu a nih. Hieng êm êm a inkawp in kan inhmangai thei ding khawm in kan in ring dêr nawh sienkhawm, Pathien thutlung am anih ding aw ti ruok chu kan hriet nawh.
Kan mizie leh kan nunpui hi chu kan inhriet vawng kan ngaituona ruok chu kan inhriet nawh ti inla inkhêl kher naw nih. Kan inhmangaina thu chu inzâwt sênglo khawpin kan inhmangai a, in ngai taluo leiin mittui far châng hi a bo naw chu ani deu tak. Fone-ah thu kan hangin thawn hin ka hmangai che kan inti chun pakhatin ka hmangai lem dai che a lêt sawmin ti khawpin kan in thawn hlaka, kan in hmangai thu kan hangin thawn chang chun kan umhmun kûng ve veah chun kan hlimin kan innui nasa thei hle, suk tawp dân ding khawm kan nei chuong ngai naw a, Pathienin ami pêk I nih inti’n kan suk tawp hlak hiel a nih.
Hmangaina thu in zâwt inzâwt inla khawm hangin hril uor thei rak khawm ani chuong naw leiin hmangaina bawkah a tawp nawk tho ang hin kan inkârah chun a’n lêng a, ei hmangai tak hai leh ei hangin dittuo a ei in ngaizawng ta chun in ngai êm êm in an kuomah um kâr nghâkhla in an kuomah um zing ei nuom hlak. Chuong ang chun kei nikhawm chu in hmangaitak a kan lêng vêl chun kan in ngai na chun zuol tieng a min pantir pe a, nuom nuom a inhmu chu an thei si nawh. Ka hang lêng châng chun an hawi ka ti thei hle a, sienkhawm zânkhuo a hung sâwt ta ding hin a kuoma um anhawi nâwk zuollai zing chun inphalam a um rûk thei hle, chuong hunlaitak chun Albert Einstein a thukhaikhin “When you sit with a nice girl for two hours you think it’s only a minute, but when you sit on a hot stove for a minute you think it’s two hours.” na thu hi a hung tho ser ser deu zing hlak a, sienkhawm nuom le nuom lovin in mangțhatzai rêl chu a țul nawk kher hla bawk si.
Kum hni-le-chenve vêl a hungliem ta chun kan inkawpna khawm a lo ni ve duoi tah a sienkhawm, hmangaina chu tuoitharzing ang khawpin kan la’n hmangaizing a, hringramah hieng ang lawm lawm hin mi hi an inhmangai ve dim chu aw ti khawp hin kan ngaituo ve neu neu hlak a, tûkhat chu inkhêl kan neinaah chun vangduoitlâk takin kan sukpal hlau el tah a. Kum tam taksa insawisêlna ka nei zeu zeu chu ka sûnghai bulah kan sawisel nuom rak si nawh; asanchu, kan khêl ding hi a’n mi khap ding kan lâu leiin ka lo ip chu hrietsuokin ka um ta hlau ela, daktawr chun ‘ka lung a țha naw thu le damsâwt thei ding ka ni taluo nawh’ ti ka sûnghai chu a hril ta ngei a, keikhawm chun chuong ang ding chun ka loin ngai thupuirak naw leiin ka hriselna chu a tlasie deu chun a’n lang tah a. Sienkhawm, Sangi ruok chu hril chi ah ka ngai si nawh.
Kum dang a’n vawi nawk hma chun thil tam tak hi ka lungrilah ngaituona a hlu sip zoa, ka hmâtienga thil ding ngaituo ve chu a țul el bawk si, Sangi bul a chun ka hrisel nawna lairiltak chu khê-suok ding chun ka ngam bar si nawh. hang hril dingin a suongrilah fei-ang-sun khawpa a um ding chu ka phal dêr el si nawh. A hmatieng ka dâwn sei lei chun țhezai rêl ding chun ka lungril ka siem a sienkhawm, kha chen kan lovin zuina lei chun thutlûkna siem chu ka ngam bar si nawh. Nghâknu hmelțha ka duthusâm ding ang khawp, a nêka țha fel le minza thiem kha ka beisei nek a țha ka hang tawng ta el kha ka lunglâwm akim vawng vawnglai a ințhezai ka rêl el ding chu ka tuorna êm êm a, zânmuo khawm intuoremloin ka umzing hlak. Hienga ka um um chun chu nakie inhnupal rawi a tih ti’n zukin suk pachanga zuk hril ka tum po leh ka hmangaina kha a zuol nâwkpei hlak bawk si ’ Aw iengtinam hun-le-ni hai I hmang hlak a, lungphâng in maw nauangnuiin, doralpui kiengzai rêl el rawh ka lung di lunglai lawmna’n ” ti hla a hung in lang vawng vawng a, ka hmangaitak Sangi țhenawna biethu inhlân in hlimtak le lunglawmkima a um ve chu ka duthusâm tak chu a lo ni ngei. Sienkhawm, a ta dingin a țhatlai po ka bulah hmangzoin pielralah lo inlalwisan ta lang, khawsâwt ngawta a hun hmang ding le mal taka a hringnun lam tung lam suk hrawpui ding neiloa a um el ding chu ngaingamlo takin intheizai rel dingin ka sukthluk tah a.
Ka hmangai che ka ngai che ti a kan lovin hlan ta sa hai po po kha puon-ang-chul ding chun ka phal thei bîk lul nawh. Ka natna hresien khawm a mi hmangaina khan dere inchangtir chuong naw ding ka hriet leiin ka hmangai êm êm kha ka hmangai naw angin inchangtiri in ințhe theina ding kawng um thei sun a ni leiin ka biek nuom naw che ti a țul ta si. Ka tlânsan el chu a ngai ta leiin khêl hrilin kan țhelpui el tah a.
Khang zân hunlai ang êm êm a ka tuorna kha chu kei ngei khawm kan thiem naw a, kan kârah sêltu um siloa a lungrilna dinga ka siem kha tuchen khawmin ka lan thiem naw takzet. Hmangai hle lang khawm ka hmangaina thu chu sâksuok thei dingin an lang ngai si nawh. Hun le ni a țhangloa hun ka hmang chun iengkhawm ngaituo mumal khawm ka nei thei ngai ta naw a, iengkim hin ama min ngaitirtu’nah a mi siem chu ani ta lem zing si a.Kei-le-keiah hi hla hin ami dêng el hlak tah a“In nghil ta maw valmawi I tiemthuhai, a sâwt naw ngei hmangai di valmawi” .
