NU HAI Po PO INRENGIN DITSAKNA VOCHUOM CHIBAI
· Sên têt ei nilai a inthawk hmangai êm êm a mi enkhawltu,
· Ei inthei naw hunah khawm mi mengpuia, ei inhun ding mi nghâka, a imu suok khawm hril lova tuor hram hramtu,
· Ei damnaw hunhai a ei thlaphâng ding min lauin ei bulah mi tungngha hlaktu,
· Ruolhai ei ban naw inlau êm êma thei patâwp a țhang la tu,
· Fâk ding khawlaiah an hmu châng fa ngamloa a nau ta dinga in tienga la hâwn țawk țawk hlaktu,
· A rûka a nau ta dinga mithli insawpa lo țawngțai hlaktu,
· Silfên țha inbel ngamloa a nauin mi inhar rawi a tih inlau luot lei a silfên țha khawm inbel ngamlotu,
· A hrai lawmlai hunna a hrai nêka a rûka lungrila lo hlim hlaktu,
· Bawrsâwmna a hraiin a tuok huna a nêka lo tuor nasa lemtu chu Chûnnu ngei hi an lo ni a nih.
Thlaphur (May) thla a hung thar chun, ei lo tuong êm êm, a mi hmangaitu nu hai ni a hung tlungkâr nghâkhla takin eilo insiengsa mup mup a, a țhenin thilpêk ding țha tak tak, a țhenin hmun fangpuia, hlim le lawm tak a an thei tawpin an nu hai an suk hlimna hun a hmang dingin an lovin sieng sa a, sienkhawm
Chulaichun, nu ti a ko ding nei ve talo a țhen tamtak ta dingin mithli insurtirna ni a hung tlung ding hi hawphur takin an lo hmathlîr mek ve thung a nih.
Nu nei talo hai khawm thlasie naw mei niuva, ei tuorsel bîkleia nu einei ta naw a nih ti ngaituona nei inla, inhmu talo dingin ei um nawa, van ah ei ta dingin ințhe naw na hmun ah ei la umkhâwm nawk seng ding a nih tie hrea insuk pachanga um dingin ka ditsak takzet cheu a nih. An thlarauin a umpui zing cheu a, duot takin a enkhawl zing cheu a, a kutpha ropui sungah ei him a nih. Nau fel chun anu ditzawng chu a thaw a, a nu chu a suklawm zing angin, an thlarau mi chenchil zingtu hi sukhlim zing ei tiu.
Vawisûn nu hai ni a hung tlung hin keikhawm, ami hringtu ka nu leh kan hun hmangdanhai lungril ngaituona mithla’n tamtak a hungin langtir a, ka ngaina a mi suk zuol hle’n ka hriet. Anna M. Jarvis hin nu hai ni hi insersuon dingin lo huoi naw sien chu mi tamtak khawmin nu hai pawimawzie hre ngar de hai sien khawm, ni bik tak a nu hai ngaituo zûl bîkna hun hi an nei dim aw ti chu ngaituona mi siem thei ding chu a nih.
“Khawvêl mihriemhai lai hmangaina nasa tak chu nu hai hmangaina hi a nih” tiin hril inla hril suol kher naw mei nih. Chulaizingin, mani nau an hring ngei ngei hmangai țhak lova um khawm hril ding an um ve nuol, sienkhawm keia ding chun ka nu mi hmangaina anga nasa chu ka la tawng der nawh.
Nikhat chu, khawlai kan suoka ka nu leh in tieng kan inlawi meklai chun ru chun ami nang ta hlau el, ni hlîp hlak kan chawi sie nawh, mi inah hang châwl a hang chamhrie khawm chu thil nuom um tak, inphlam a um sak mei mei khawmuolpawr lai a mi in a hang lût el ding chu kan ti pei a, ru hlak a suorzing bawk, ru kan do zing a, kan țâwp ve ve lai khawm chun ka nu chun mi chelin a nau ami hmangzie chu hril lovin a kutpha chu ka lu chungah chun sie’n ami fepui peia, a kutpha chun iengkhawm mi sukhlîp thei naw sien khawm ka ta dingin an pêkzona hrillova iengtiklai hunah khawm hin a mi hmangaina chu a lovin langtir ran an nawm ie! Nu hai hin chu an mi lova hmangai lawm lawm de maw!
Khuonu’n nu hai hi âwmnêm taka an duong ani ang hrimin hmangaina an hau bîk hle, a țhen tamtak lem chun pa hai nekin ei innêlpui lem ti inla indik mei a tih. Iengleiam ei ti chun, biek an inhawia, ei nuom nuom ei hrilpui theia, ei dithai intlunna, an manhla lem kha ei hriet tlat annawm; an mi hmangaina ei hrietzinglai a țhen chun chânglâkna takah a hmang pawl khawm ei um nuol nawk a nih.
Harsatna tamtakin ami tlâkbuok hlak chang ni hai hin, nu hai hi rinum ti ngawi ngawiin mi hai bul ah chen khawm inpha hnuoiin, a sûr a sa, a dei a lum dawn lovin an hrai lungmâwl tak takhai pâr thlan theina ding a ni phawt chun iengkim thaw an inzuom vawng hi an lo nih, chuong ang bawkin, pa hai khawm an lo ni ve a nih. Ieng dang an thlahlel nawh, an hrai hai hlim-le-lawm êm êma an sakhmel an hai hmu bâk hih. Khawvêla hin ieng dangin hlimna bul a pêk thei nawh, hmangai ngawi ngawia an en lawp lawp hai chau naw hin chuh.
Ei nu hai hin a rûk takin ei kuomah hin hung hril suok naw hai sienkhawm, ieng anginam an chungah lungril ei put ti hi an milo en ve zing a nih ti hi in hmai naw inla nuom a um. “Ka nau hin a mi hmangai tak tak naw am a nih aw” ti’n a rûkin an lungrila hin an ni le an ni thlasie luotin an um hlak a nih. Pa hai khawm hin mani nuhmei hai hi hmangai taka enkawl ding an nizie hi hrethar nâwk seng inla nuom a um takzet a nih. Nuhmei hai hi duot ngawi ngawia en ve ding hi an nih, anthla khawm a si awl êm êm, a chang leh insêkna lungril annei khawm hi thil mak khawm a ni nawh, thil âwm hrim khawm a lo ni lem a nih. Nu hai hi a derdep lem an ni leiin duot taka enkawl chu pasalhai thaw mâkmaw ding chu a nih. Ei Pathienthu khawmin nuhmei chu bêl kawi awl lem an nih ( 1Peter 3:7 ) tih a zîek khawm ani hiel a nih.
Papui țhenkhat lem chun, an inngaizawnglai hmangaina biethu thlumtak an nuhmeihai ngai nghawk ding rak khawpin an hmangaizie an hril an hrila, an hungin neizo kum tamtak an innei hnung khawm chun a hmangai thu hai khawm chu a hril puok ta naw hrim hrim hlaka, a hmangaina chu ngaitha’n a hmang lem tah a. Nuhmei hai rau khêk, vuok le chîer khum khum an hlaw lem rawp ta lem a, an lungril a na hlak a thisan pâwt pâwt khawm nuomna lungril an put pha hlak khawp a nih. Nu hai hi Pathien thilpêk hringna mi hluopuitu an ni leiin, sukna lovin, sukthlabâr lovin hmangai takin enkawl ding hi an ni lem a nih.
Hmangaina kawngah chun iengdang khawmin a khuomzolo chu chûnnu hmangaina mawl hi a lo nih. Pathien ei hriet naw inlauin theitawp suo’n ei ta dingin an țawngțai a, a chang lem chu khawvar hielin an țawngțai, chubakah, pa hai khawm anlo tâwp chuong nawh. Ei țhangpui thei ve hun nghâkhla takin an mi thlîrzing a, thawsuok ei hang nei a nuhai khawmin ei sum thaw suok sa khawm hmuphak lovin ei hang sie tawl a, chawm thei dinhmun ah ei um hunah hmusit takin ei hmu nawk hlak hin an lungril chu a na âwm vang vang a nih. “ Nau I hung nei ve phât chu ka hmangai zie che hi I la hung hriet ding a nih” ti’n nu hai hin an nauhai an hril khum vet hlak hi thil indik inkhêllo ding chu a nih. An hratlai, an damlai hunah nuhai hmusit taka che, an thu khawm zâwm nuomloa hun hmangha’n an nu thi ruong an hang hmu meu ta chun, an thawsuolna le nunrawng taka an chunga an che hlak hai hi insîra an ruong chung a țapa ngaidam inhnie hi ei khawvêlin a pal mêk chu a nih. “Insîr’n van a ur” ti po thaw an nih tah sie.
Ei khawvêl inher danglampei ah hin ei nu hai leh ei ngaituona khawm a danglam ta leiin a enkhawldan hai khawm ei var a țul a, hmusit el lova an hriet naw hai hril vartu ding ei ni leiin khek le inti var insuo lova mâwlmang tak a “I mawl” ti țawngkam an hriet ding chu an dam sung annaah châm a ta an hriet naw hai khawm indawn ngam ta lovin ei sie el ding anih.
Nu la neihai hin ei nuhai hi hmangai takin ei thei tawk tawkin ei hmangaizie hai inlangtirin enkhawlna sin thaw ve dingin țhang lang ei tiuva, “I nu hi tukhawmin mi hung hmangai pêk nawng an ti che a, nangkhawm tukhawmin mi hung hmangai pêk nawng an tih ” ti hi ka nu țawngkasuok ka hung lak a nih.
Nu hai ni ( Mother’s Day ) hi hlim le lawm takin le indamlai ni hi hruolhrui angin sei sienla, indamlai ni a tlâkhma khat i nun hlima hmang dingin ka ditsakna insângtak kan hlan cheu nisien..
Keikhawm ka mimal tak a iengkawm thilpêk thei ding ka nei sie nawh, hi hla hi ka nu’n mi hmangai a mi enkawltu, iengtiklai khawma mi thlathlam lova, duot tak le mi hmangai ngawi ngawia mi enkhawltu ka nu Rebeck Lalmuonpui ta dingin kan hlân ve a nih.
CHÛNNU ZÅR HNUOIAH
Khuonu zarin hung seilien vein,
Lalpa kal chawidan min chûktirtu;
Chûnnu ka nei hi ka hnuoi malsâwmna,
Hring ka chan sung innghil naw ning.
Ka nu ka nu ka hmangai che!
I mi hmangaina ka ta dingin a hlu sie,
Chûnnu nang ka nei che hih ka thla a muong a nih.
Chûnnu hmangaina ka thlîr changin, Nitin in ka nun mi sukhrattu; Hring khawvêlah I hmangaina khum an um nawh. Chûnnu iengkim ah lawmthu ka hril che.
Lalpa kut hratin thuoi peisien che, I zâr hnuoiah lêng hi ka hnuoi rohlu; Kan lungkham bângna chu nang i nih chunnu, I hrai chawi ha’n malsâwmna kan inhlan che.
No comments:
Post a Comment