KA HRINGNUN LAM TLUONG ( BUNG - V )

KA HRINGNUN LAM TLUONG ( BUNG - V )

Thla iemanizât ka um chun vai antam ziet mi’n an lo hril huoi huoi chu ka hung hriet ve deu deu a, tuol ei hang suok changin zântieng Bus Stand-ah bus lo nghâkhai ringawt khawm eini puipung ni a mipui fêkhâwmzât zet hi an lo umbuom chun vai le thokâng umnawna ramsam an lo nei naw tie chu a lo indik ngei ding a ni hih ti’n hlim siuin ka fêliem nâwk el hlak.

Deshbandhu College-ah Admission hai kan hang thawzo chun class chu hang la țan ve el ding chun ka hangin sîngsa ve țan tah a. Manikhat a sikûl rûn hang bêl ding chun a boruok ka tawng chu alan tak hle, a lampuihai khawm hriet chu a loin tak khawp el. Mani vêng sûng ngeia sikûl lo kai chu anhawi ziet ei hrietsuok nâwk el hlak. Ka ramțunna ve chu Taj Mahal sûng a felût țhenkhat hril angin, a’nang lût lei a lût-le­­-suokna hrehrang talo ang el chun ka khatin ka hang suok ve chu ka lampui fena tieng tieng chu an ang ka ti thei khawpel a, ka khata college ka hang kai chu a lampui chu ka bo map ka bo map thei hle el.

Țum khat chu, sikûl kai a ka hang suok nâwk chun, ka tîn tieng ka auto lâk chun autopu chu meter-in ka hang fêpui chun chêng sâwmruk (Rs.60/-) chaua kan inkâr tlung theina chu a lampui inang thei em lei chun inkuolpui inkuolpuiin kan tlân kan tlân a, “PHYSIOTHERAPY” tie signboard kan inlam kawina lai chun inchikna ka nei a, chu zawng suokna ding chun a lêt a lêt chêng ka sêng talei chun ka țum el tah a. Autopu meter-a outing neipui ang el chu ka nih. Ke chun kan in zawngsuokin himdam takin ka tlung thei hram tah a.

Sikûl ka hangkai țantir chun a rinum ka ti khawp el, class-ah ruolpâwl ding an um naw el bakah eini mi hmel hmu ding ka nei naw lei chun inhawinaw ka ti thei khawpel. Vaițawng ei la hang hrietnaw vêl bawk leh hun rinrumtak chu a nih.  A rûktakin a châng chun thlasiet um khawm ka ti thei takzet. Ka ruol inpâwlpui hlak hai ngai khawm a sukzuol pha thei hle.

Semester Exam kan hang nei kai chun sâwt tak tak ei hang meng chun exam bûkah ei hangin țhung a, Pathien kuomah ka hangin hlân châng chun (imu suok hle lei chun) inringhma’n “Lalpa imu inhnik takin min intir la” hi ka lo sâmfûk  ngun hlak thei khawpel, a rûkin pêsut ka lo thaw nâwk hlak.

Inchûkna tieng vaihai țhang anlâk nasat thei ziet chu hmu le hretu ka lo ni va nazarin, eini tlangmi tamtakin ei phâknaw takzetin ka hriet. Anni chu hun tâwm lawm lawma tiem hi anthaw beknaw’n a’nlang. Eini ruok chun exam tâwm lawm lawm hin eipu tlângpuia, anni thawdan angina thaw tâwl inla chu anni nêk hman hmanin eiinsâng hle ding a nih ti chu lungrila hung lût hmasatak chu a nih. Kei ngei khawm chu chu hrezinga zâwm le la thaw ve lo zing chu ka nih. Chu el bakah, inringzona hi annei êm êm, anni angina inringzona hi nei ve inla chu eiphâk ding ang phâk ngei ei tih ring a um.

1^st Semester kan hangzo chun Isu Piengchampha (Christmas) a hung hnai ta khawpel a, a țhen mani vêngtieng suok ding leh a suok mêk an um a, kei ruok chu kumkhat danah suok ding angin an mi si tawp a, chuong chun, vêng suok loin Christmas hmang ding chun ka um el tah a. Nu-le-pa hai boin ka vawikhat hmangna ding a ni leiin a harsa deu chu a nih. Urlâwk zan a hung ni chun khawsâwt um ka ti bîk zuol êm êm el a, pâwl ding hlak tûkhawm an um naw leiin ka khât chauin common room-ah kan țhung tawpa, mithla’n urlâwk zan hunlai a ruolhai leh umkhâwm hunlai dâm an min ngaituotir chun mithli chu a tla inhâwk ve ang reng. A țhenin misuk khawsâwttir nuom hrim hrima hâwlsûnga an mepui thlalâk dam anhung thawn mari leh. Chuonhchun, hunhai chu ka hang hmazo a, ringnêkin ami hung sukkhawsâwttir tum hai chu anhlawtling hle el. Christmas le kumthar tûk chu ringnaw tieng dai chun anhawi ka ti ve hle’n ka hriet. Amiruokchu, vêngtieng ang êm êm chun anhawi thei naw chu a ni deu tak. Timing thap thap a chêt a ngai leiin lêngkhâwm khawm nuom ang chen chen hmang thei a ni naw leiin vêngtieng ei ti nâwk el hlak ma ma chu a nih.

Kum a hung thar chun kan Pastor Lalditsak Inbuon-in Bible Study Fellowship (BSF) thawțanni zâtin vaihai leh anneina hmuna chun țhang ve dingin ami fiela, keikhawm chun ami fielna chu hnâwl el lovin ka zui hlak a. Kan Bilble study neina chun thil tamtak inchûk le hriet ding a lo tam êm êm el a, ka va țhang chu eini tlângmihai hin vai ringtuhai hi ei phâknaw rimsi ziet hi amin ngaituotir a, anni chu Patheinthu hi sui tak takin anbei a, hriet khawm anhau, Pathiethu tieng an ințhang hrat pha hrim a nih.  Eini tieng ka thlîr leh a chanchințha mansapui bângnatak hai hin ei tluknaw takzet. Hieng êm êm a anhun hai anpêkzo bîk el hi ka hmuin inzak um khawm ka tih. Chu ruol ruol chun anni bula ringtu hmunkhat a Pathienthu kan hang hriltlâng chun anhawi hi ka tiin a thlamuong um thlak hle.

Vai ramah chu vai antam ding ang hrim chun ringnawtu antam lei hin ringnawtu ei ti el hlak a, an pathien siemfâwm mei mei ringzo êm êm anbiek a, an pathien siemfawm hai hi a design țha țha an hung biekzawmpei el am a ni ti ding khawm hin pathien hi an hau  a, sienkhawm, an ringnaa andet ziet chu ei sui po leh ei hrietchieng nâwk el hlak. Ringtu a inpehai khawm chuong ang tho chun an hung det thlap el a nih. An ringna Pathien hi an inzapuiloa khek suok ngam ringtu anni bawk a nih. Nikhat chu, AIIMS Hospital-ah ka U Muongi an ât kan nghâk malam chun thingpui dâwn dinga kan fena chun vai muslim pakhat chun mipuilai e tiloin a mawng lingpum chun a pathien chu a bieka a khêk vel el chun ngaituona an min neitir nasa hle. Mipuilai hmana a pathien biek anzapui naw ziet chu a fie chieng khawp el. Kei ngei khawm ka tluknaw ziet le Pathien ka lo inzapuina hai amin ngaituotir ta hiel a. Eini ve ruok chu ei ngaituo po leh a mei mei a Pathien lo ring am eini aw ti ding hin ei um rawp hlak.