KA HRINGNUN LAM TLUONG ( BUNG - V )

KA HRINGNUN LAM TLUONG ( BUNG - V )

Thla iemanizât ka um chun vai antam ziet mi’n an lo hril huoi huoi chu ka hung hriet ve deu deu a, tuol ei hang suok changin zântieng Bus Stand-ah bus lo nghâkhai ringawt khawm eini puipung ni a mipui fêkhâwmzât zet hi an lo umbuom chun vai le thokâng umnawna ramsam an lo nei naw tie chu a lo indik ngei ding a ni hih ti’n hlim siuin ka fêliem nâwk el hlak.

Deshbandhu College-ah Admission hai kan hang thawzo chun class chu hang la țan ve el ding chun ka hangin sîngsa ve țan tah a. Manikhat a sikûl rûn hang bêl ding chun a boruok ka tawng chu alan tak hle, a lampuihai khawm hriet chu a loin tak khawp el. Mani vêng sûng ngeia sikûl lo kai chu anhawi ziet ei hrietsuok nâwk el hlak. Ka ramțunna ve chu Taj Mahal sûng a felût țhenkhat hril angin, a’nang lût lei a lût-le­­-suokna hrehrang talo ang el chun ka khatin ka hang suok ve chu ka lampui fena tieng tieng chu an ang ka ti thei khawpel a, ka khata college ka hang kai chu a lampui chu ka bo map ka bo map thei hle el.

Țum khat chu, sikûl kai a ka hang suok nâwk chun, ka tîn tieng ka auto lâk chun autopu chu meter-in ka hang fêpui chun chêng sâwmruk (Rs.60/-) chaua kan inkâr tlung theina chu a lampui inang thei em lei chun inkuolpui inkuolpuiin kan tlân kan tlân a, “PHYSIOTHERAPY” tie signboard kan inlam kawina lai chun inchikna ka nei a, chu zawng suokna ding chun a lêt a lêt chêng ka sêng talei chun ka țum el tah a. Autopu meter-a outing neipui ang el chu ka nih. Ke chun kan in zawngsuokin himdam takin ka tlung thei hram tah a.

Sikûl ka hangkai țantir chun a rinum ka ti khawp el, class-ah ruolpâwl ding an um naw el bakah eini mi hmel hmu ding ka nei naw lei chun inhawinaw ka ti thei khawpel. Vaițawng ei la hang hrietnaw vêl bawk leh hun rinrumtak chu a nih.  A rûktakin a châng chun thlasiet um khawm ka ti thei takzet. Ka ruol inpâwlpui hlak hai ngai khawm a sukzuol pha thei hle.

Semester Exam kan hang nei kai chun sâwt tak tak ei hang meng chun exam bûkah ei hangin țhung a, Pathien kuomah ka hangin hlân châng chun (imu suok hle lei chun) inringhma’n “Lalpa imu inhnik takin min intir la” hi ka lo sâmfûk  ngun hlak thei khawpel, a rûkin pêsut ka lo thaw nâwk hlak.

Inchûkna tieng vaihai țhang anlâk nasat thei ziet chu hmu le hretu ka lo ni va nazarin, eini tlangmi tamtakin ei phâknaw takzetin ka hriet. Anni chu hun tâwm lawm lawma tiem hi anthaw beknaw’n a’nlang. Eini ruok chun exam tâwm lawm lawm hin eipu tlângpuia, anni thawdan angina thaw tâwl inla chu anni nêk hman hmanin eiinsâng hle ding a nih ti chu lungrila hung lût hmasatak chu a nih. Kei ngei khawm chu chu hrezinga zâwm le la thaw ve lo zing chu ka nih. Chu el bakah, inringzona hi annei êm êm, anni angina inringzona hi nei ve inla chu eiphâk ding ang phâk ngei ei tih ring a um.

1^st Semester kan hangzo chun Isu Piengchampha (Christmas) a hung hnai ta khawpel a, a țhen mani vêngtieng suok ding leh a suok mêk an um a, kei ruok chu kumkhat danah suok ding angin an mi si tawp a, chuong chun, vêng suok loin Christmas hmang ding chun ka um el tah a. Nu-le-pa hai boin ka vawikhat hmangna ding a ni leiin a harsa deu chu a nih. Urlâwk zan a hung ni chun khawsâwt um ka ti bîk zuol êm êm el a, pâwl ding hlak tûkhawm an um naw leiin ka khât chauin common room-ah kan țhung tawpa, mithla’n urlâwk zan hunlai a ruolhai leh umkhâwm hunlai dâm an min ngaituotir chun mithli chu a tla inhâwk ve ang reng. A țhenin misuk khawsâwttir nuom hrim hrima hâwlsûnga an mepui thlalâk dam anhung thawn mari leh. Chuonhchun, hunhai chu ka hang hmazo a, ringnêkin ami hung sukkhawsâwttir tum hai chu anhlawtling hle el. Christmas le kumthar tûk chu ringnaw tieng dai chun anhawi ka ti ve hle’n ka hriet. Amiruokchu, vêngtieng ang êm êm chun anhawi thei naw chu a ni deu tak. Timing thap thap a chêt a ngai leiin lêngkhâwm khawm nuom ang chen chen hmang thei a ni naw leiin vêngtieng ei ti nâwk el hlak ma ma chu a nih.

Kum a hung thar chun kan Pastor Lalditsak Inbuon-in Bible Study Fellowship (BSF) thawțanni zâtin vaihai leh anneina hmuna chun țhang ve dingin ami fiela, keikhawm chun ami fielna chu hnâwl el lovin ka zui hlak a. Kan Bilble study neina chun thil tamtak inchûk le hriet ding a lo tam êm êm el a, ka va țhang chu eini tlângmihai hin vai ringtuhai hi ei phâknaw rimsi ziet hi amin ngaituotir a, anni chu Patheinthu hi sui tak takin anbei a, hriet khawm anhau, Pathiethu tieng an ințhang hrat pha hrim a nih.  Eini tieng ka thlîr leh a chanchințha mansapui bângnatak hai hin ei tluknaw takzet. Hieng êm êm a anhun hai anpêkzo bîk el hi ka hmuin inzak um khawm ka tih. Chu ruol ruol chun anni bula ringtu hmunkhat a Pathienthu kan hang hriltlâng chun anhawi hi ka tiin a thlamuong um thlak hle.

Vai ramah chu vai antam ding ang hrim chun ringnawtu antam lei hin ringnawtu ei ti el hlak a, an pathien siemfâwm mei mei ringzo êm êm anbiek a, an pathien siemfawm hai hi a design țha țha an hung biekzawmpei el am a ni ti ding khawm hin pathien hi an hau  a, sienkhawm, an ringnaa andet ziet chu ei sui po leh ei hrietchieng nâwk el hlak. Ringtu a inpehai khawm chuong ang tho chun an hung det thlap el a nih. An ringna Pathien hi an inzapuiloa khek suok ngam ringtu anni bawk a nih. Nikhat chu, AIIMS Hospital-ah ka U Muongi an ât kan nghâk malam chun thingpui dâwn dinga kan fena chun vai muslim pakhat chun mipuilai e tiloin a mawng lingpum chun a pathien chu a bieka a khêk vel el chun ngaituona an min neitir nasa hle. Mipuilai hmana a pathien biek anzapui naw ziet chu a fie chieng khawp el. Kei ngei khawm ka tluknaw ziet le Pathien ka lo inzapuina hai amin ngaituotir ta hiel a. Eini ve ruok chu ei ngaituo po leh a mei mei a Pathien lo ring am eini aw ti ding hin ei um rawp hlak.

AW KA ȚHIEN

~John L. Parate

AW KA ȚHIEN 07.12.17, 3:05-4:38am

Muol zakâr dana lêngin hring ramah,

Chûnnunnêm thaikawi zîekțielin a fam tah,

Famdairiel I chang an ti che maw;

I vullai ni a tawi taluo, ka țhien!

Kei chun dairiel I chang el ding hi ka phal thei nawh.

Aw ka LALNUNNÊM, ka țhien fam rauthlalêng hi,

Vân in ropui hung bêlin a hung kai;

Natna rêng um ta lo na hmun inhawi ah

Lo kuongkuo rawh aw ka Lalnunnêm.

Khuonu’n hieng ding hin an duong che maw,

I sûlhnu I hlimthla el maw chantâwk;

Beisei lo umlâi I tâwn a hrâng hi ka tuor thiem nawh.

Luoithli rêng a hul thei mawl nawh, ka țhien!

Risâng muol I liem el hi ka phal thei lul nawh.

Ruolkim a dârang lênglai ni ka dâwn a,

Sîngmittui hulzâi rêng a rêl thei nawh;

Hring ram hung lêt zai rêl el rawh,

Luoithli nuol bângzâi kan rêlna di’n, aw țhien!

Hnena hlado sam a lêng ka va nuom ngei.

RINGHLA NAW

RINGHLA NAW

~John L. Parate         26.11.17, 11:26pm

Hi hnuoi țawngsie phur ram hi, harsatna tin rengin a bâwmna ram,

Duthu âi-ang-sâm changin ditlo thlang a țul nâwk hlak si;

Japthah ngei khawm a pa in sûnga inthawk hnawt suok a umin,

A Pathien chun a pa ro cho khawm ni lovin Israel ro khâwmtu’n a hung ruot.

Ring hla naw ring el raw ei hma țhuoitu Lalpa Pathien a ni;

Țawngtaiin Lalpa Isua chun innghat la

Jepthah îengin Lalpa’n lampui siem pek ngei a ti che.

.

Ka hringnun ka thlîr leta, ka hringnun chau ngawi ngawia umin kan ngai,

Harsatna le beidawngna tlâk buoka ka umin;

Lalpa ṭhatna hmu inring naw lang chu chau ngei ka tih.

Amaa ringna innghat ngamtu hai ta ding chun a thil thaw thei zie a fie hlak.

.

Harsatna tuok hlak inla khawm Pathien ringtu eini na hi midang nêka ei dangna a nih.

Ei hringnun kei hartu Pathiena, ei beiseina suk hrattu a ni rawp hlak.

Lalpaa ringna neitu chu tlâng sukhning thei ruollo;

Lalpaa lampui chu dapsuok tum tlat el rawh.

I NGAINGAM DI'M

I NGAINGAM DI'M

Hi khawvêl ram zau taka chêng vein,

Nun beidawng, harsatna I tawng hlak maw;

I hringnunna an ui'n I ngai hlak am?

Mi dangta dinga hlimna siempêktu in;

Beidawngna chau maw ti'n ngaituo ,

Hung ințhang lien peiin,

Ra hungin suo'n.

Thi el I nuom hlak tiraw?

Boralna kawng chu I zui nuom tiraw?

Unau dâwn chieng rawh!

I chún-le-zu sakhmel innui sieu chu,

Țapna'n a thlȃkbuok el ding chu,

Unau,i ngaingam di'm a nih.

Hlimna hi I ta ding chun hmêlma a ni a.

Mi po ensanin inngai hlak maw;

Mi hlimri I ta dingin țawngsi angin I ngai tiraw?

Lungngainain a chênchil zing che a,

Beidawngna chauin amin huolvêl,

Tih a inngaituo changin,

Thla si ngawi ngawiin.

Vângneina chu i chungah tla ve lovin,,

Vângduoina chu a hlâwmin hung tla in;

I beiseina éng ve chu thimin a hungin chang hlak tiraw?

Vângduoina phuorbetiin I um a,

Lungngaina hlingin bâwmin,

Mal ngawi ngawia inngai si’n

I buoi zo tah! 

Date- 04:01 – 5:06am 21.05.17

I KRAWS PUT KHA ENNAWN NAWK RAWH

                                    I KRAWS PUT KHA ENNAWN NAWK RAWH

                                                            

                                                                                        ~John L.Parate

 (“I kraws put kha ennawn nawk rawh” ti thupuia ka hmang hi kum 2014 a inthawka tuchena ka ngaituona a la lientak chu a nih.)

Khing tieng khing tienga hnengdein kan um a, nisienlakhawm, kan thuok a dawng si nawh; lunginzîngin kan uma, nisienkhawm, kan bei a dawng si nawh. Suknawmnatin kan um a, nisienkhawm, mâksanin kan um si nawh; vuok thlûkin kan um a; nisienkhawm, sukbohmangin kan um si nawh.

Kan taksaa hin kumkhuoin Isu thina chu kan put pei hlak a, Isu hringna khawm kan taksaa hin ân lang theina dingin. Keini hringa la umhai hi, Isu leia thi dingin inmantirin kan la um rawp a, Isu hringna khawm kan tisa thi theia hin ân lang theina dingin. (IIkorinth 4:10&11)

Paula hi mi lêhkhathiem, mi var, vantlâng chung tienga lêng phâk, mi ngaisâng hlaw tak a nih. A hming hmasa chu Saula (desired) a piengthar hnung ruok chun Paula (humble) tih a hriet ani a. Paula chu ringtuhai dodâltu ropuitak ani nghe nghe, sienkhawm Damasca lampuia Isu an tuokpuia inthawk chun a hung danglam ta a, a hmu chu a hrietchieng hle lei chun Pathien chu a ringzo hle tah a nih. A thilthaw inhawk hai chu thaw ta lovin, a thaw inhawknaw Isu hminga thuhril chu a hung thaw ta lem a.

Tirko Paula hi ringtu missionary hai lai chun ei hriet le inlâr tak ni dingin ring a um, krista ta dinga pasalțha indik, kohran doctrine tamlem khawm tirko Paula i zîeka inthawk khawm a ni bawka, thutlung thar buhai khawm a chen-ve zîektu ani nghe nghe a nih.

Tirko Paula’n,’ Kraws thu chu bohmang zinghai tading chun invêtna a ni sih a, eini sandam zinghai tading ruok chun Pathien thilthawtheina a ni lem,’(1 Kor 1:18) tiin a lo hril a. Khawvêl ropuina anthawka thlîr chun kraws thu țawngsie phur , misuol tawpkhâwk hai chau chantâwk le phutâwk a nih. Pathien thlarau anthawka hmufie tuhai ruok chun kraws thilthaw theizie hi hriechiengin an ngaisang a, huoisen takin Lalpa an zui hlak. Ei hmadawm a hin harsatna, rinumna kara khawm tuor hram hram a, hmusit tuhai tadinga țawngțai pêkna hiel ei hung nei chun, kraws thu a bohmang zinghai tading chun invêtna a ni sih a, ei nihai ta ding chun chungtienga ei lâwmna suksângtu ani lem. Ei mihriem ram anthawka thil thei lo anga in lang kha Krista zarah ei hnena, ei thil thawtheina suklangna alo ni lem dai a lo nih.

Ringtuhai hi ei kalchâwina hin hmusitu tamtak tuokin ei la tuokpei ding chu a nih. Țhatna, insângna beiseina hnawtin ei hringnun ei khal mêklai hin einiah suolna um hi ahung hrâng nasa deu deu ding a nih. Thilțha thaw tumin hunhai ei hmang tum po leh suolna hi a hung zuolin a hung hrat nawk el hlak.

Kristien tamtak suolna’n ami hne thei dinga zawi êm êm el hi ei nih. Ei kraws putdan hai hi in ang kher naw nih, a țhenin kraws hi putin tlûkpui châng nei ei tih. A țhen ngîrpui khawm um ei tih. Suolna hi a chien a lien a um naw a, Lalpa hmaah chu suolna hi angkhat vawng a nih. Thilțha chu hrie ran inla khawm ei thaw vawng kher nawh, hrat nawna nei seng ei nih. Chulei tak chun anih nitina hnena puong in suol thupha chawina ei nei a ngai. Chu nitina ei kraws chu zo le zâng ti taka put dingin ami phût kher nawh, tlûkpui châng nei inla khawm, tho nawka tuorsel taka put a ei kalvari tlâng(Isu Krista ke bulah) a in nghat dingin ami ti lem anih  Ei suol phurhai hi phurzingin hemde lovin um rawi ei tih ti inlau a um takzet a nih.

Suolna a hung hrat po leh ei mihriem hlui a hungin lal nawk el hlak. Ei nitin suol thaw/phur hi ei hemde zing naw chun suolna hin mi kuopdet deu deu a ta felna ngainêpin ei um ding a nih. Tulai țhangthar tamtak lem chu thilsuol thaw hi inti vaina’n an hmang rawp hlak. An tlûkna inhnuoi takin antlâkna ruok chu inthuok tak an nih. Thilsuol anthaw po leh anniah inti pâna anneia ngaidan indiklona tamtak neiin hun chu an hmang mêk a nih.

Suola ei tlûklai zing khawma Pathien chun a malsâwmna’n amilazui zing hlak, sienkhawm suol ei thaw/tlûk am khawm inhre loin ei umchâng ni khawm tamtak um a tih, nitin el hin ei kraws put hi ennawm hlak seng inla chu suol thupha chawina ding eilo va neirawn awm deh.

Thilsuol eilo thaw, ngaidam inhni nachâng eilo hriet naw a ni chun nakie ei suol thaw hai hi hun hungin vawi hungin vawi a ta ngai nêpna neiin hung re tiel tielin phurzing ei tih tie ți a um hle a nih. Chulaizingin, suol hrim hrim chu Sandamtu kuoma puong ding a nih. Lungril sûnga inthawka sim nuomna leia suol puong a ni chun, chu chun mihriem nunah țhatna an suo thei a nih. Amiruokchu, inngaitlâwmtaka suol thuphachawina chu nei ding a nih.

Uday Park - 110049, 
New Delhi 

KA ZÂLMANG RAUTHLA

KA ZÂLMANG RAUTHLA - 23.10.17

~John Parate

Before I had come to the realization that things really were different for us.

Damsûng khawsak ngaituona leiin mitin tadingin hun âwllên a tlâwma, buoina chi hran hran in a tlâkbuok a, ei hnung le hma dâwnkîrna le dâwnlâwkna hun a um ta nawh. Mani hmazâwn chitah buoiin thil um ta le la um ding tamtak hai chu eilo hmuhmei hlak. Ka khawvêl hmathlîrna hin thil tamtak hriet le hmu ka nei, ka khawnghat khêl tienga mi chu hmufie tum lovin ka lo en liem mei mei hlak.

Mimtuk Thla (December) a hungin her a, a tlângpuiin mani vênga umlo hai chu mani vêng chitah suokin Isu Piengchampha (Christmas) sûng-le-kuo hai leh hmang tlâng dingin vêng tieng an suok deu fûr hlak a, keini ruok chu suok lovin kan um a. Thlasik hunlai ani leiin kan unau pathum chu kan riek hmunkhat hlaka, a naupangtak kani leiin ka uhai chun alai a chun an min riektir hlak a.

Țumkhat chu mak danglam takin ka mangah kan sûngkuo’n inhawi takin tie tie dam sepin kan umkhâwma, inhawi tie êm êmin kan umlai chun, zîng dâr 3:30am  velin ka inlai chu ka hung țhanghar phuta ka kâwl le vêl ka zuk ngha vêl chun re dapin kan uma ka unauhai chu anlo inbawr bawr bawk sie, thil tamtak chu ka zâlmang le ka hung harsuoklai chun thil mak tak ka ngaituoa, nu le pa hai hmu phak loin hmun dangah ei um a, zal hmun ei rem hlakin nu le pa haiin ‘bawi bawi’ tiha an mi ko hlaklai dam kha ka ngaituoa “Fahra” takin kan hmua, ka ngaituoa “nu le pa hai phen ding, ami ngaituotu ding, iengtinam ka nu ka pa hai boin khawsâng kan tih aw” ti’n kan ngaituo chun ka thla a sia, a ruokin ka mithil chu ka houi ka huoi el, kuo a hung var chun ka mithai invûngin ka hnar a ping deu chun ka uhai’n a’nmin dawn chun ka hritlâng tum deua a nih ti’n ka dawn tawp el a.

Khang ang mang ka nei kha tuchen hin ka la theinghil nawa, keiah hin nitin hin ka lungrilah a hungin langzawm zing hin ka hriet. Khang ang mang ka neia ka hung harsuoka inthawk khan mi tamtak nu, pa, tih a ko ding nei ve talo tamtak ka lo hmuhai chu anlungril a sâwl thei ding le anthla a sietna a lo tam dingziet hai ka hang hmufie chun ka lungril ngaituona an suk sip hle el. Ka hmu phâk chin le ka kieng vêla um hai bêk chu annun ka sukhlim theina ding bek hi ka thei tawk tawka anni țhangpui theina ding ka nei tlâwm hle khawma, a suk hlimtu ni ngei dingin ka thei tawk tawk min suoktirtu chu a hung nih. Nu, Pa, tih a ko ding ka la nei a nei ti ka hriet hin (nu le pa ah) ka piengthar nawk hielin kan hriet. Nu le pa nei talo hai chun annu le pa hai hmu thei nawk nihai sien chu andamlai hunah nêkin an nu le pa hai ngai nawk zuol ngei an tih ring a um, asanchu anni anga nu le pa hai hlutna hrechieng zuoltu anni tlat ding leiin.

Ram danga um chun nu le pa hai le eiin biekpawna chu phone hai bak hi ani naw leiin, nu le pa hai hi nikhatah vaikhat bek inbieklo chun, ka nu ka pa hai iem anchang ti bek hriet naw chun lung inhawi nawna tak hi ka nei hlaka. Ei khawvêl hmang dan a’ndang deu leiin zâl hun le tho hun hai andang leiin imu inhniklai tak dam anmi hung biek phak hin lungsen ang vangin țawngkam kha vangin ka lo thaw ve hlaka, sienkhawm hmufie ka nei a inthawk chu hadam takin hunhmang inmil naw nisienkhawm a dawngsawng danhai inchûkna amin neitir hle. Buoina thaw laklaw thil um sienkhawm ka phone rie ka hriet chinah chu ka nu la pa’n buoina lo tuokpal a tih tie inlauin ngaipawimawna mi siem hle’n amin umtir. 

Nu le pa mila dampuia an um hi a thlamuong thlakin an hlutna hi ka hung hrietchieng hle el, mi tam tak nu le pa hlutna, nu le pa inzana, nu le pa ngaisaklo tam tak hmu le hriet ka nei phat hin ka hmu ang hi hmu ve thei hai sien ti lungril ka nei nasa thei hle. Ei hamțhațna ei dawnghai po po chu ei hrietzing theina dingin ngaituo rawp hlak ei tiu.

Khawvêl a sîng a za tam laiah,

Ka chûn le zuo ka thlamuongna

Ka chun le zuo ang ditsaktu

An ang sûng a muong umtak

Ka zâlmang rauthla’n hung lêngin

Ka chûn ka zuo hlutna min neitirin

Iênglêm khai khin thei ka ta

Ka hamțhatna hih.

Ka chûn ka zuo chungah ka lâwmna a’nsang

Damlai hun sûngin inngei diel diela lêngin

A kieng thei nawh ka hlimna

Tui ang luong ka laikhum chungah

Ka lungawina in nih

Ka chûn le zuo ngaihlutna a chul thei nawh

Zîng ni no angina a hung suok hlak. 

Nu le pa nei ta naw khawm nîng ei tih. Hi hnuoia khawm hin Kristienhai chun Krista le inzawmna leia hlimna ei nei thei, a hmangaina le a umpui zingna thlamuongum tak an nei thei a nih. Nundan kawng tinreng hin Isu chu a min hnaitir thei a, a hmangaina amin hrietthuk tir a, thlamuongna In chu sirbi khatin a min hnaitir pei a nih.

KA HRINGNUN LAM TLUONG ( BUNG- IV )

                    

                      KA HRINGNUN LAM TLUONG ( BUNG- IV )

                          ~John Lalsansuok Parate

Hun le ni hai a hung liempei chun, ka sûnghai țhahnem ngaina le ka hmakhuo ding harsatak a inchawm ding hre sa nihai sienkhawm an mi tumrupuina leiin keikhawm pawl sâwmpahni (Class-Xii) ka hang pasih chun Khawpui tieng bêl ding chun kan hangin siengsa tah a.

Nu-le-pa hai bula khawsa țhang, vêng danga suok zen zen kani naw leiin ka hawphur lungril rûk khawpela, unaulaia a naupangtak ka ni leiin ka sûnghai hun tawite anhmel ka hmu naw khawma ka lo ngai hman hlak anni leiin ka lungrilah chu ngaituo chu a mi suksei thei hle.

Ka fe ding hun le ni a hungin her suok ta ding meu chun, khawsâwt taka hun ka hang hmang ding ka ngaituo rawn tak chu ani tak a nih. Khingtieng ka û Ramnivar hlak chun milo tuong hlêng a tih, unau hangin biekpui le umhmun khat ta ding chun. Amiruokchu, khawsâwt ka hriet taluo leiin a ieng iengkhawm hin ngaituona hi chu ami sukbuoi hle. Ka suok ni ding zanah chun ka ruol țhenkhat chun an minthla malamna dingin țuonga chun zâlthlâng bung bung thaw’n kan riek khawma, inhawi chu anhawi kan ti hle. Lungril rûk takah chu ka hlimțha thei naw chu ani deu tak.

Û-le-nau, ruol-le-pai ngaina mi kani leiin ka zuk suok ding chu kan hawk naw khawpel. Zingkhuo a hung var ta chun leh, mithli chu a hnei nuom vang vang ngei deh! Ka ruolhaiin an mi ngai ve hle chu ning a tih, inthla dinga an mi chibai ding chun anhung țapte nui tawl meu chun keikhawm a ienga sek taluo in ni velo me chu; ka hang țapte nui ve kang langa, sienkhawm innui sara inthla ve kha anțul sie.

Iengdang ka ngaituo thei bîk nawh. Ka nu khawm chun a harsa chu a ti naw bîk nawh. Ka nu chun ami ngai taluo leiin amitthli far khawm min hmutir nuom lovin room tieng thaw ding pawimaw um raklo chun an vêl an vêl chu keikhawm chun ka hrietthiem hle a, kan hang suok ta ding meu chun ka nu chu mi en khawm a mi en ngam ta naw a, chawrtieng fe’n inhmu ngamloin amin thla el tah a.

Ka pa’n Imphal Airport tieng chun amin thlazo hnung chun, keikhawm Vairampur tieng chu panin ka vuongsuok taa, vuongna ka hang chuong ta meu chun hmel hriet ngailo deu fur chun bul ka hangțan ta chun kan pansak panthlanga a um hai chen khawm ka mithlan a hung lang zung zung el tah. Khawsâwt chu a vang um vang vang ta ngei de aw! Tukver tieng ka hang dâk chun lêkhabû a eilo inchûk ‘khawvêl hi anhluom a nih’  ti hai kha a takin ka hang hmu ta peia, khawsâwt suk umtu na ro roa chun a manhla hle’n ka hriet.

Delhi Airport-ah kan hang țumzo kan hang suok chun a Delhi boruok lumzie an hril  zuk suongtuo kha chu a lovin tak ngei, a vuongna a inthawk ka hang suok chi chu, a thli lum hung hrang ku chu a vuongna mi muot am a nih ka ti chu, a thli lum kha a lo ni ta dai bawk sie, nitin a ka zuk umna ding chu ana maw ti’n ka zuk nghawk țan ta nghal el.

Ka û Ramnivar chun a milo hmuoka, in tieng kan hangpan, in ka hang tlung sawtnawte chun ka sûnghai ka zuk hrilzo hnung chun ka nute Lalpiengruol (ka nu sang) ka hang biek vel chun ‘keini tieng chu 05:00P.m chau a lan rih ka hang ti a ama hlak chun kei ni khawm ani ve tho a nih la hang tih. Vengtieng nisa a tla inhma’n anthim inhma leiin an ang naw hle leiin ka hang buoinuoi țan ta peia.

Ka hang tlungzo a zînga inthawk chun inah rețhapin ka um țan ta nghal a hriet le pawl ding hlak la nei bawklo ka ni leiin umkuo chu a sâwt naw thei naw chu a ni tak. Ieng dangin ka khuo chu a suk sawt hran naw a chu ka tuhai kha ka zuk ngai ngawi ngawi zing el a nih. Nitin ni ma khata inah hang um um el khawm chu ningtel umin ruol ngaina khawm a zuol nuom hle.

Nitin ka hun hmang chu zal, in, le fawn khel chu ka ni intlâkpui chu ani deu tak hlak a;  thlalakhai ka zuk en chang ni lem hin chu ka khuo chu a mi suk sawt nawk nasa zuol thei khawpel. Thlalâk en hin khuo a suksawt thei anih ti ka hrietchieng a inthawk chu ka en inzing ta naw hle el. Hla hai hlak a khawsâwt hla tieng bawk hlak hi a hungin lang nawk bawk hlak sie.

‘Five Hundred Miles (500 miles) - Justin Timberlake’   in a sak le ‘Ei Chung Si ar – Vanlalhriet’ in an sak hai pahni hi nitinin hin ka ngai hlak a, thlalakhai le hi hla ngaikawp chang lem hin chu mithli chu a hnei nuom khawpêl. Sienkhawm inti pasal deu chun ka mithli chu infartirlai chu ka nei nawh a; tuchen hin hieng hla hai ka ngai chang chun kha hunlai a ka ngaituona ka senghai po po amin hriet suoktira, a boruok  ka la hiep thei hlakin ka la um hlak.

Sa hal hala in sûnga kan umkhawmlai hun hai ka zuk ngaituo chun chu, khawsawt taka ka khata in ka umlai chun sûngkima kan um khawma nihai kan hmangliem hunhai a bat bat hin ka ngaituo kir a, hril ami sukhai thei hle a mithlaah chu khang ang hun kan hmang khawmlai chu a ni angin ka la chengthei a, sienkhawm tak ramah kan umkhawm thei sie naw chu ka zawi rawng rawng el hlak chu a nih.

 SÛNGKIMA LÊNGLAI NI

Ø Khuonu zârin damte’n kan seilien a,

Chûnnu le zuopa hmangaina zarin;

Rawlthar lungril chu hungput ta in,

Tu hin hmatieng thlîrin ințhe ei țul ta sie maw!

          [ Kar hla sienkhawm damtakin aw,

           Chung Pathienin mi vêngtawn pei sien;

           Kum le ni hai chu tiem zingin,

           Sûngkima lêng ni lan her nawk ngei a tih. ]

Ø  Zânkhuo hung nguoiin kan rûn ka dâwna,

Dâwnin um khuo a sâwt ngei ie;

Aite nawnpâr zunlêng ka ngai vawng vawng,

Kan nunhlui hai chu  hmalai an changzo tah.

Ø  Hlimin  sûngkimte’n kan lêng hlak,

Turuok hin ni’n a mi her dangta sie maw;

Kan rûn sûng riel ang a deizo tah,

Sûngkima lêng nawk kâr ka nghâkhla.

Ka hang um phuttir thla a inthawk chun in tienga suok hun ding chau chu lungrilah chu a um ta zingel, a admission khawm la thaw lovin hunlai chu ka hang hmang tungpei tah a..

ICHE ICHE

            ICHE    ICHE 2015

              -John L.Parate

Ø  Aw hang dâwn ve ta u’m,

Tulai țhangthar hun in dangin;

Nundân rêng khaikhin ruol lo,

Leikai leikai  ti’n an tlan.

      Aw chûn le zû0 indâwn ve hlak am,

      Ei hrai ei nau, an intui ral zo tah ;

      Amak ngei maw ,

      ICHE ICHE ti’n an thang hat hat

Ø Zântieng hung tlungin

Iêngdang rêng dâwn theilo in;

An tui thieng chu si ang tlân dingin,

ICHE rûn an bêl  nâwk hlak.

Ø A pair(2) in thlawnin,

An tluonglam rêng an chêp zo;

Hring chanlai  liem el ding hi,

A pawi ngei chan dit um lo anih.

UMKHAWSAWT

        UMKHAWSAWT    6pm   14.06.17

-          John L. Parate

Umkhawsawt chang ni hin maw,

Umkhasawt hi ka hril sêng sie nawh;

Sîrah Puon ang ami hnawl,

Tlangtin bawm romei ah ka lan zâm ral awm ie.

Sepui khata suok ni inlang khawm,

Kei chu sieli khamawi ka ni ve si nawh;

Laikhum zâlin siengmit siengin,

Iengdang reng dawn lovin,

Senlai nau ang luoithli nûl a awl nawk hlak.

Mariek tea tinkim dâwn changin,

Lunglai sûm ang hung zîngin;

Anrieng lungleng ding reng dâwn lovin,

Khuo lo nguiin aw lungleng a zuol nawk hlak sie.

Sulhnung nunhlui sui châng ni hin,

Chung siar thangvân ah a kai ni hin;

Thingtin pâr ang an vul mawi,

Luoithli nûlin vângkhuo ka thlîr ngam nawh.

PATHIEN IN EI NIH

      PATHIEN IN EI NIH 15.05.17 2:30am

                -John L.Parate

o  Rigtuhai hi Pathien lawm tlâka um ding le hringnun thienghlima um dingin a mi phût , 

Kawng iengkimah a ditzawng thaw le țhafamkim lampui chu hraw dingin a mi phût  bawk a nih.

Tisa ditzâwng hai le inkei hnawk chu a rem ta naw a nih, thlaraua um ei ni ta leiin.

            [Pathien In ei nih, Pathien Thlarau chêngna tlâkin ei um am?

            Pathien Thlarau ei niah a um ti ei hriet naw am a ni?

            Pathien thlarau thienghlim chu eini ah chêng harsa a ti ngei ding a                 ni.]

o  Zaidam le ngilnei a ni leiin ei suolhai chu mi ngaidam nawk el a tih tiin ei ngai;

Eini suol tienga thi ta hnunghai ieng tin am suolah la hring zing thei ei ta?

Suolah ei lo hring zing hlak ani chun a lungsenna mei nikhat chu a la chawk ngei ding a nih.

o  Ei lungril sung temple thienghlimna chu khawvêl sum le pai rothil duâmnahai hin  tawk buoi a ta,

Ama inphatsan a khawvêl lawm zawng suolna le khawlona in a tawkbuoi an lau hle a  nih.

Dawtheina le thuhnuoirawlna umhai chu sie ding le inhmang ding a phal naw a nih.

AW HMAR LANU

AW HMAR LANU   25.04.17 2:35am

-       John Parate

Dit naw che ruol an ni nawh,

An hlimna le lawmna i nih.

An hlut che hi a’n thaw dik ngei!

I hriet naw chun, aw nang hmeltha,

Lanu po po sing zotu,

I singmitin thuva singmit a ieng.

[I sakhmel a mawi chuong ngei, Hmar lanu,

A hâdamin lunglâwm a kim

Siemtu le I hnam I chawimawi;

Hringtin val mit tlûkna I tling ie,

Siemtu che innghil lovin aw.]

I hming khawmin lung a kuoi ngei ie!

Hnam puon I hangin bel meu chu;

An lung i va hang dum ngei aw!

Hmangainaa tamsawlin I siem hi,

Kawplai D’ an nei seng sienkhawm,

Hmangaina’n an kùrpui che, uoiin sîngin.

Sharon raws, Phaizawl lili par kha i nih.

Hemna hrim hrim i nei dêr nawh.

Hmel, zuktuoi anga hrat Hmar lanu,

Hang thlîr vêl ta’m romeizâm kârah

Tlanghai an hung zuon khûm che,

Fimkhur rawh tuipuiin chim pil rawi a che.

AW KA HMANGAI

           AW KA HMANGAI               19.02.15

              -John L.Parate

            1. Zantîeng virtli’n a mi sêmlai khan,

               Nangin iengtin am i mi ngâi;

               Ka hmangai ang che’n mi hmangai ve’m?

               Ka hmngaina che hi ka damsûng a ding a nih.  

                          [Aw ka hmangai

                           Lung damin liem el rawh

                           Hrilhei kei tlinglo ni el sien

                           Ka dâwnzo nawh

                           Nang ngâi lunglêng hi.]

             2.Aw lungmâwl, ka di parte ka ṭhe ding,

                 Tinkim dâwn zai I rêl naw maw;

                 Kei chu nau ang ṭaplai ka bâng thei nawh,

                 Ka  ṭuna tlâng an dang ding hi.

                   3. Chung sawrthla a hung êng hin,

                  Nang ngâiin suilung kan vâi maw; 

                  I sakhmel tawng chângin hai ang a mâwl,

                  Zankhat hmêl hmu lovin lai khum ka bêl ngam nawh.

                   4.Ka ngaina che ansâng leiin,

                 I rauthla bêk pawm ka nuom;

                 Nang ang siengmit thla a châm an um nawh,

                 Nang ngâiin laituol ka lêng nâwk hlak ie!